Tingkesan Basa Sunda Kelas 7 Semester 1

Minggu, 16 November 2025

 Tingkesan Pangajaran 1 Tatakrama

 

1. Wawanohan (perkenalan) lumangsung antara dua urang atawa leuwih anu anyar pinanggih. Bisa langsung silih wanohkeun diri bisa diwanohkeun ku batur.

 

2. Wawanohan lumangsung dina paguneman, nyaéta ngawangkong, ngobrol, atawa ngomong silihtémpas.

 

3. Paguneman dina basa Indonésia disebut percakapan atawa dialog, dina basa Inggris disebutna dialogue. Paguneman kaasup kana kagiatan komunikasi dua arah. Prak-prakanana aya nu nanya aya nu ngajawab.

 

4. Kiwari paguneman bisa langsung paadu hareupeun waé atawa bisa ogé maké alat komunikasi kawas HP.

 

5. Dina waktu paguneman diperlukeun tatakrama, boh tatakrama paripolah boh tatakrama basa. Tatakrama basa atawa undak-usuk basa mangrupa sopan santun makéna basa dumasar kana kakawasaan, kalungguhan, kaakraban, jeung hubungan antara panyatur, pamiarsa, tur jalma nu dicaritakeun.

 

6. Tatakrama dipaké dina rupa-rupa widang kahirupan, boh kahirupan sapopoé, dina kaulinan, di sakola, di kantor, di tempat wisata, boh dina karya sastra.

 

7. Kaulinan barudak atawa kaulinan urang lembur kaasup kana tradisi, anu ngalibetkeun paripolah jeung basa. Aya rupa-rupa kaulinan, aya nu maké alat aya nu henteu. Aya kaulinan budak awéwé, kaulinan budak lalaki, jeung aya kaulinan budak awéwé jeung budak lalaki.

 

8. Dina kaulinan sok kapanggih kakawihan, nyaéta wangunan puisi anu dikawihkeun, tapi cara ngawihkeunana henteu maké patokan maneuh saperti kawih. Kakawihan kaasup lagu rayat, anonim, tur sumebar di masarakat.

 

 

Tingkesan Pangajaran 2 Dongeng

 

1. Dongéng nyaéta carita rékaan anu dikarang dina wangun basa lancaran kalawan sumebarna sacara lisan, nyaéta tatalépa ti hiji jalma ka jalma séjénna.

 

2. Ciri-ciri dongéng téh, di antarana waé, sumebarna sacara lisan, teu kanyahoan saha nu ngarangna (anonim), ngagunakeun basa lancaran, eusi caritana mangrupa rékaan malah réa anu pamohalan, jeung ukuranana ilaharna pondok.

 

3. Unsur carita nu ngadeudeul dongéng, nyaéta jejer, palaku, latar, galur, puseur sawangan, jeung amanat.

 

4. Nurutkeun eusina, aya rupa-rupa papasingan dongéng, nyaéta fabél, parabél, legénda, sagé, jeung mite.

 

5. Sawatara dongéng anu geus dibukukeun, di antarana waé Dongéng-Dongéng Sasakala (Ki Umbara), Aker Dangsé (Wahyu Wibisana), Jurig Kabayan (Tini Kartini), Sakadang Kuya jeung Sakadang Monyét (Ami Raksanagara), jeung Salawé Dongéng-Dongéng Sunda (C. M. Pleyte).

Labels: Basa Sunda

Thanks for reading Tingkesan Basa Sunda Kelas 7 Semester 1. Please share...!